Sa pagkilos laban sa kurakot

SA PAGKILOS LABAN SA KURAKOT

talagang mahirap ding magrali

ibubulgar mo'y boses ng api

akala ako'y dito nawili

nang mawala yaring kinakasi

ngunit ito'y pagtupad sa layon

sistema'y bulok, di naaayon

serbisyo'y ninenegosyo ngayon

pangako sa masa'y ningas kugon

pinagsamantalahan ang masa

ng mga ganid na dinastiya,

kapitalista, oligarkiya,

at mga tampalasang burgesya

inimbestigahan ang flood control

nagbundatan ang mga contractor

kasabwat sa gobyerno'y napukol

bulsa ng kasapakat bumukol

mga ito'y dapat matuligsâ

lalo na ng masang binabahâ

nanunungkula'y dapat bumabâ

o sila'y piliting maibabâ

dapat sila'y ating mapanagot

sa kurakutang katakot-takot

kaya walang dapat makalusot

parusahan ang lahat ng sangkot

- gregoriovbituinjr.

09.21.2025

Ang sumbrero kong nawawala

ANG SUMBRERO KONG NAWAWALA

nasa rali ako, kainitan ng araw

nasa Luneta'y walang sumbrerong proteksyon

pag-uwing bahay, saka lang iyon lumitaw

aba'y kaytagal din namang nawala niyon

namigay ng polyeto, kaytindi ng sikat

ng araw, lakad, bigay, at nangalahati

ang isang ream, sana'y binabasa ng lahat

anong tindi ng init, umupo sandali

anang isang kasama, sumbrero mo'y nahan

sabi ko, naiwan ko sa loob ng bahay

tumabi sa akin at ako'y pinayungan

dama ko'y alwan, nagpasalamat ng tunay

buti na lang, muling nakita ang kakampi

kong sumbrero, lumitaw lang, di ko hinanap

sumbrerong beterano na sa mga rali

at kasama ko sa paglikha ng pangarap

- gregoriovbituinjr.

09.21.2025

Kaya dapat RESIGN ALL, Rep. Cendaña

KAYA DAPAT RESIGN ALL, REP. CENDAÑA

mali talaga ang Marcos Resign lang, Rep. Cendaña

dapat RESIGN ALL ang panawagan, mag-resign lahat

Marcos Singilin! Duterte Panagutin ang chanting

ng marami, dapat ang bayan dito na'y magising!

huwag na tayong papiliin sa dalawang paksyon

ng naghaharing dinastiyang pamilya sa ngayon

dalawa silang dapat kapwa usigin ng bayan

sa mga katiwaliang ginawa nila naman

di maipaliwanag ang milyon-milyong ginastos

sa labing-isang araw, di ba, Sara Jane Piattos

ugali pang magbantang may ipapapatay siya

ganyan ba? benggador ang nais mamuno sa masa?

nilagdaan yaong batas na siyamnapu't siyam

na taon uupahan ng dayo ang kalupaan

natin, ng bansa, animo'y ibinenta na tayo

ipinagkanulo na ang bayan sa mga dayo

kaya dapat panawagan sa Setyembre twenty-one

ay RESIGN ALL, kapwa usigin ang dalawang iyan

di sapat ang Marcos Resign kundi Sara Resign din

RESIGN ALL! iyan ang wastong panawagan ng masa

- gregoriovbituinjr.

09.20.2025

* ulat mula sa pahayagang Philippine Daily Inquirer, 09.19.2025

Walang pinag-iba

WALANG PINAG-IBA

anumang tae, walang pinag-iba

alam na alam nga iyan ng masa

sa doktor lamang sila nagkaiba

na batayan ng sakit o siyensya

sa disenyo ni Tarantadong Kalbo

na isa sa aking mga idolo

na mangguguhit o mandidibuho

natumbok ang problema sa bayan ko

wala sa oligarkiya't burgesya

o sa kapitalista't dinastiya

ang pag-asa ng masang nagdurusa

kundi sa bayan kong nagkakaisa

at kay Tarantadong Kalbo, salamat

na dinibuho'y nakapagmumulat

na basura, tae't burgesyang bundat

sa ating lipunan ay nakakalat

panahon na ngang linisin ang bayan

mula sa mga tiwali't gahaman

dapat magkaisa ng sambayanan

at tuluyang baguhin ang lipunan

- gregoriovbituinjr.

09.20.2025

* litrato mula sa fb page ni Tarantadong Kalbo sa kawing na: https://www.facebook.com/photo/?fbid=1305984484314392&set=a.562746088638239 

Tale of three Sara

TALE OF THREE SARA

ang una'y si Sara Piattos

di mapaliwanag ang gastos

milyon-milyon sa onse araw

banta pa'y may ipapapatay

ikalwa'y si Sara Dismaya

sa flood control, contractor pala

pondo ng bayan, isinubi

mga proyekto'y guniguni

kahanga-hanga ang ikatlo

singer na si Sarah Geronimo

sa kabataan, kanyang bilin

bulok na sistema'y baguhin

Sarah Geronimo, Mabuhay!

ngala'y nagniningning na tunay!

payo mo sa prinsipyo'y atas

itayo ang lipunang patas

- gregoriovbituinjr.

09.20.2025

* litrato mula sa fb page ng ABS-CBN News

* ulat mula sa https://abscbn.news/3VXIDlL 

Nais ko pang basahin ang 100 aklat

NAIS KO PANG BASAHIN ANG 100 AKLAT 

nais ko pang basahin ang sandaang aklat 

na pawang mga klasiko bago mamatay

mga kwento't nobelang nakapagmumulat

aklat ng mga tulang sa mundo inalay

kayrami ko nang librong pangliteratura,

pampulitika, o kaya'y pangmanggagawa,

pang-ideyolohiya dahil aktibista

at gumagawa pa ng dyaryong maralita

kung malathala ang nobelang lilikhain

na paksa ko'y iskwater sa sariling bayan

kung nobela sa obrero'y matapos ko rin

asam ko'y mabasa't tangkilikin ng tanan

basa ng basa bago mawala sa mundo

ng pangarap kong sandaang klasikong aklat

librong isinalin sa wikang Filipino

ay, kayrami pang dapat mabasa't mabuklat

- gregoriovbituinjr.

09.19.2025

* litratong kuha sa Manila International Book Fair 2025

* maraming salamat sa kumuha ng litrato

Pangarap ko'y sa laban mamatay

PANGARAP KO'Y SA LABAN MAMATAY

sakaling ako'y biglang mamatay

ayokong mamatay lang sa sakit

nais kong sa laban humandusay

binira, binara, o binaril

halimbawa, nabasag ang mukha

nagkabatuhan sa demolisyon

sa pakikibaka'y bumulagta

dahil tinutupad ko ang misyon

ayokong mamatay lang sa banig

ng karamdaman, ako'y tatayo

habang nakikipagkapitbisig

sa masang sa hirap na'y siphayo

nais kong matulad kay Eurytus

na buhay ay sa laban nagwakas

di matulad kay Aristodemus

na tumalima lamang sa atas

sabi, kapwa sila pinauwi

ni Leonidas dahil sa sakit

sa mata, sa harap ng tunggali

sa Thermopylae, sandata'y sukbit

sa historya, sila'y naging tanyag

si Eurytus ay naging bayani

si Aristodemus nama'y duwag

ako naman sa masa'y nagsilbi

- gregoriovbituinjr.

09.18.2025

Ang birthday wish ni Kara David

ANG BIRTHDAY WISH NI KARA DAVID

"Sana mamatay lahat ng kurakot

sa Pilipinas", iyan ang birthday day wish

ni Kara David sa mga asungot

na trapong sa kabang bayan nangupit

ng bilyon kung hindi man trilyon-trilyon

na buti't nabisto dahil sa baha

ano bang nangyari't sa simpleng ambon

tatlumpung segundo lang ay nagbaha

marahil ay biglang nabanggit iyon

sa kanyang birthday nang tanunging sadyâ

"anong birthday wish mo?" at nagkataon

ang nabanggit niya'y wish din ng madlâ

nabisto'y kasi'y ghost flood control projects

bilyon-bilyong piso sa dokumento

ngunit pondo'y sa bulsa isiniksik

ay, guniguni pala ang proyekto

kaya binabaha ang mamamayan

sa munting ambong tatlumpung segundo

kay Kara, maligayang kaarawan

sana nga'y matupad ang birthday wish mo

- gregoriovbituinjr.

09.18.2025

* litrato mula sa fb

* ika-52ng kaarawan ni Kara David noong Setyembre 12

Ang librong U.G.

ANG LIBRONG U.G.

may aklat akong

hangad basahin

pagkat nais kong 

natala'y damhin

nais mabatid

ang talambuhay

ng isang lider

bago mapatay

na mahalaga'y 

ating malaman

bakit ba siya'y 

nakipaglaban

kanyang prinsipyo'y

bagang nagningas

na sa tulad ko'y

handâ sa bukas

nasabing aklat

mabili sana

subalit salat

ang aking bulsa

pag-iipunan

itong totoo

collector's item

sa aklatan ko

- gregoriovbituinjr.

09.18.2025

* kuha sa booth ng Anvil Publishing sa Manila International Book Fair 2025

Paanyaya sa Setyembre 21, 2025

bayan, nalulunok mo pa ba

iyang katiwalian nila

nabibilaukan ka na ba

sa proyektong 'ghost' wala pala

bayan ko, binaha ka na ba

dahil flood control palpak pala

kabang bayan pala'y binulsa

ganyan kabulok ang sistema

kung ang ganyan ay ayaw mo na

at tingin mo'y may pag-asa pa

tara, ikaw na'y makiisa

mula Luneta hanggang EDSA

Luneta tayo sa umaga

hapon naman tayo sa EDSA

doon tayo'y magsama-sama

sa Setyembre 21, tara

- gregoriovbituinjr.

09.17.2025

* September 21, 2025 - 53rd anniversary of Martial Law in the Philippines and 44th commemmoration of International Day of Peace

Babaha muli sa lansangan

BABAHA MULI SA LANSANGAN

noong bumaha sa lansangan

halos malunod na ang bayan

pondo ng flood control, nasaan

binabaha pa rin ang daan

ay, pulos pala guniguni

kaya masa'y namumulubi

pondo'y binulsa, isinubi

ng mga kawatan, salbahe

kaya sa September twenty one

babahang muli sa lansangan

maniningil ang taumbayan

ibagsak ang mga kawatan

subalit isyu na'y sistema

pamamayagpag ng burgesya

oligarkiya't dinastiya

kapitalismo'y wakasan na

imbes panlipunang serbisyo

imbes magkatubig sa gripo

imbes na tumaas ang sweldo

serbisyo'y ginawang negosyo

ah, babahang muli ang masa

mula Luneta hanggang EDSA

upang baguhin ang sistema...

upang baguhin ang sistema!

- gregoriovbituinjr.

09.17.2025

* mapapanood ang bidyo sa kawing na: https://www.facebook.com/share/v/1JB2ULyRQD/ 

Artikulo Onse (laban sa nang-oonse sa bayan)

ARTIKULO ONSE

(LABAN SA NANG-OONSE SA BAYAN)

tandaan ang Artikulo Onse

sa Konsti: On Accountability

dapat trapo sa bayan magsilbi

at masa'y di nila inoonse

ay, onsehan na ang nangyayari

sa dami ng project guniguni

pondo ng bayan ang isinubi

ng mga contractor, trapong imbi

ay, sa hayop pa sila'y masahol

bilyon-bilyong piso ang ginugol

sa mga guniguning flood control

hanggang bulsa nila'y nagsibukol

trapo nga sa Indonesia't Nepal

ay pinatalsik dahil garapal

tila bansa nila'y naging kural

ng mga baboy pag umatungal

pang-oonse na'y dapat wakasan

ng mga binahang mamamayan

na dapat bumaha sa lansangan

upang wakasan na ang onsehan

- gregoriovbituinjr.

09.17.2025

* Article 11, 1987 Constitution, Section 1. Public Office is a public trust. Public officers and employees must at all times be accountable to the people, serve them with utmost responsibility, integrity, loyalty, and efficiency, act with patriotism and justice, and lead modest lives.

LITKURAN - salin ko sa BACKGROUND

LITKURAN - SALIN KO SA BACKGROUND

hinanap ko na sa diksyunaryo
salin ng BACKGROUND sa Filipino
may likuran, karanasan, pondo
anong etimolohiya nito?

sa Ingles, back at ground, pinagsama
ito yaong compound word talaga
eksaktong salin nito'y wala pa
ngunit ito'y kailangan ko na

kaya akin nang napag-isipan
salitang "litrato sa likuran"
compound word, pagsamahin din naman
kaya nabuo ko ang LITKURAN

sa disenyo'y kakailanganin
sa tulang nalikha't lilikhain
sana, salitang ito'y tanggapin
ng bayan at ito na'y gamitin

- gregoriovbituinjr.
09.16.2025

* ang litkuran ay kuha sa MOA

Kapag nagalit ang taumbayan

KAPAG NAGALIT ANG TAUMBAYAN

kapag nagalit ang taumbayan

sa talamak na katiwalian

nangyari sa Indonesia't Nepal

sa Pinas nga ba'y maiiwasan?

iyan ay malaking katanungan

sa Indonesia't Nepal, nagalit

na ang taumbayan sa korapsyon

pati gusali ng parlamento

ay nilusob ng masa't sinunog

na sa korapsyo'y tanda ng poot

nagawa ang di inaasahan

sa Pinas ba'y mangyayari iyan?

aba'y naging legal ang nakawan

sa proyekto ng pamahalaan

ghost project nga'y pinag-uusapan

tumbukin ang tunay na problema

iyang kapitalismo talaga

tipid sa serbisyong panlipunan

sa ghost project, binaha ang bayan

korporasyon ang nakikinabang

bulok na sistema ang dahilan

kasakiman at kapangyarihan

oligarkiya, trapong gahaman

at dinastiya pa'y naririyan

na dapat ibagsak nang tuluyan

- gregoriovbituinjr.

09.16.2025

* ang litkuran (litrato sa likuran o background) ay mula sa pahayagang Bulgar, Setyembre 13, 2025, pahina 2-3

Di ko matiis na di lumahok

DI KO MATIIS NA DI LUMAHOK

di ko matiis na di lumahok

sa rali laban sa mga hayok 

bayan ay talagang inilugmok

ng mga kuhila't trapong bugok

hahayaan ba nating mandambong

pa ang mga tiwali't nanggunggong

sa bayan, aba'y dapat makulong

silang mga ganid at ulupong

ninakaw ay di lang simpleng pera

kundi higit ay buhay ng masa

kumilos na kontra dinastiya,

tusong burgesya't oligarkiya

pag nabigyan ng pagkakataon

ng kasaysayan, tayo'y naroon

sistemang matino'y ating layon

at paglilingkod sa masa'y misyon

ang sistemang bulok na'y palitan

ng sadyang nagsisilbi sa bayan

itayo'y makataong lipunan,

patas, parehas, makatarungan 

- gregoriovbituinjr.

09.15.2025

Daang tuwid at prinsipyado

DAANG TUWID AT PRINSIPYADO

kahit pa ako'y maghirap man

mananatilng prinsipyado

nakikipagkapwa sa tanan

tuwina'y nagpapakatao

naglalakad pag walang pera

nang masang api'y makausap

patuloy na nakikibaka

upang matupad ang pangarap

na lipunang pantay, di bulok

pagkat sadyang di mapalagay

laban sa tuso't trapong bugok

kumikilos nang walang humpay

daang tuwid ang tatahakin

ng mga paang matatatag

matinong bansa'y lilikhain

lansangang bako'y pinapatag

- gregoriovbituinjr.

09.15.2025

Sa ngalan ng tulâ

SA NGALAN NG TULA

sa ngalan ng tulâ, / dangal ko't layunin

kumatha't kumathâ, / tula'y bibigkasin

marangal na atas / ng diwa't damdamin

para sa daigdig, / masa't bayan natin

sa ngalan ng tulâ, / balita't nanilay

sa maraming isyu / ng dalitang tunay

ay dapat ilantad, / bawat tula'y alay

sa bayan sapagkat / tula'y aking tulay

sa ngalan ng tulâ, / hangad kong lipunan

ay patas, parehas / at makatarungan

bulok na sistema'y / tuluyang palitan

hanggang makataong / lipuna'y makamtan

sa ngalan ng tulâ, / makatulong sadyâ

nang hustisya'y kamtin / ng bayan, ng madlâ

at mapanagot na / ang mga kuhilà,

tiwali't gahaman / sa kaban ng bansâ

- gregoriovbituinjr.

09.15.2025

Antok pa ngunit dapat magsulat

ANTOK PA NGUNIT DAPAT MAGSULAT

pagod sa mga ginawa't rali

kay-aga kong natulog kagabi

ang nasa relo'y alas-nuwebe

di na inabot ng alas-onse

kaysarap ng aking pagkahimbing

madaling araw, biglang nagising

at bumangon sa pagkagupiling

sa pagkatha na agad bumaling

madalas na ganyan ang makatâ

pag diwa na'y gising, laging handâ

ang hawak na pluma sa pagkathâ

kaysa ang naisip pa'y mawalâ

nilabas ang nasa diwang iwi

ngunit di naman nagmamadali

mamaya ay matutulog muli

pag nakatha na ang minimithi

- gregoriovbituinjr.

09.14.2025

Nangungunang contractor sa bansa

NANGUNGUNANG CONTRACTOR SA BANSA

siya'y pinaka-contractor ngayon

na nagdiriwang ng kaarawan

ngunit sadyang may mali sa layon

na lupa sa bansa'y parentahan

ng siyamnapu't siyam na taon

sa mga banyaga o dayuhan

anupa't mas matindi pa siya

kaysa taga-DPWH

kaytindi kaysa mga Discaya;

kaya tao'y dapat lang magalit

lalo sa isinabatas niya

na talaga namang anong lupit

ang Republic Act 12252

ay siyamnapu't siyam na taon

na lupa'y uupahan ng dayo

habang sa dukha'y may demolisyon;

sa bigas para tayong nagtampo

na sa tusong dayo'y pinalamon

- gregoriovbituinjr.

09.13.2025    

Pasasalamat at pagpupugay sa mga kasama!

PASASALAMAT AT PAGPUPUGAY SA MGA KASAMA!

mabuhay kayo, mga kasama!

sa ginanap nating talakayan

bagamat may kaunting problema

ay nagawan naman ng paraan

mabuhay lahat ng nagsidalo

upang sadyang pag-usapan doon

ang tatama't nagbabagang isyu

lalo na ang bantang demolisyon

Republic Act 12216 nga

sa bahay nati'y magdedemolis

may police power na ang NHA

na tayo'y talagang mapaalis

ang forum natin ay matagumpay

unang bira sa nasabing batas

pagkakaisa'y higpitang tunay

laban sa batas na hindi patas

salamat po sa partisipasyon

mula CHR hanggang NHA

maglakad man ay nakakapagod

iyon po'y kinaya nating tunay

subalit di pa tapos ang laban

hangga't di pa naibabasura

iyang tinik na batas na iyan

sa karapatan ng bawat isa

- gregoriovbituinjr.

09.13.2025

* ginanap ang forum ng Alyansa ng Maralita para sa Katiyakan sa Paninirahan (AMKP), Setyembre 11, 2025, sa Commission on Human Rights (CHR) mula 8am-12nn, at nagmartsa mula CHR hanggang National Housing Authority (NHA) at nagdaos doon ng munting programa.

* ang RA 12216 ay National Housing Authority (NHA) Act of 2025 na nilagdaan ni PBBM noong Mayo 29, 2025; ito'y banta sa maralita dahil may police power na magdemolis na ang NHA sa loob ng 10 araw nang di na daraan pa sa korte

Walong titik na palimbagan

WALONG TITIK NA PALIMBAGAN

paano kaya ang walong titik

sa librong tila kasabik-sabik?

malathala kaya'y aking hibik

kung magpasang di patumpik-tumpik?

- gregoriovbituinjr.

09.13.2025

* kuha sa Manila International Book Fair 2025

Almusal na gulayin

ALMUSAL NA GULAYIN

talbos ng kamote at okra

payak na almusal talaga

sibuyas, bawang, at kamatis

na isinawsaw ko sa patis

habang katabi ang kwaderno

upang isulat ang kung ano

nageehersisyo din naman

upang lumakas ang katawan

bihira muna ang magkanin

kaya gulay lang itong hain

sa ganito'y nakatatagal

kahit maghapon pang magpagal

- gregoriovbituinjr.

09.10.2025

Palakad-lakad sa kawalan

PALAKAD-LAKAD SA KAWALAN

palakad-lakad lang ang makatang tulala

bagamat nakaiiwas sa mga baha

palakad-lakad, maganda raw ehersisyo

sabi ng mga atletang nakausap ko

palakad-lakad man subalit nagninilay

pinaglilimian ang mga bagay-bagay

buti't di nahuhulog sa manhole o kanal

palakad-lakad bagamat natitigagal

ang makatang palakad-lakad sa kawalan

kung matulin pag natinik ay malaliman

ika nga ng kasabihan ng matatanda

kaya sa paglalakad, huwag matulala

salamat, salamat sa inyong mga payo

upang lakad ay diretso, di biglang liko

- gregoriovbituinjr.

09.10.2025

* mapapanood ang munting bidyo sa kawing na: https://www.facebook.com/share/v/19mEmf13aZ/ 

Sa ika-3 death monthsary ni misis

SA IKA-3 DEATH MONTHSARY NI MISIS

hanggang ngayon, puso'y humihikbi

ngunit pagsinta'y nananatili

pagkawala niya'y anong sidhi

tila ako'y nawalan ng sanhi

upang mabuhay, subalit hindi

di dapat mawalan ng pag-asa

balang araw nama'y magkikita

sa kalangitan nitong pagsinta

ngunit malayo pa, malayo pa

abala pa kapiling ng masa

mamaya na naman, nasa rali

magtatalumpati, laging busy

tula sa masa't sa'yo, Liberty

ay aking kinakatha parati

love you pa rin, mahal kong Liberty

- gregoriovbituinjr.

09.11.2025

Coal at korapsyon, wakasan!

COAL AT KORAPSYON, WAKASAN!

kaylinaw ng sigaw / nitong mamamayan

na "coal at korapsyon, / wakasan! wakasan!"

sapagkat pahirap / sa madla, sa bayan

taksil na kurakot / ay imbestigahan!

buwis pa ng bayan / yaong kinurakot

ng trapo't contractor, / ay, katakot-takot

ghost flood control project / ang ipinaikot

buwis nati'y parang / batong hinahakot

DPWH / ay walang ginawa

kundi kurakutin / ang yaman ng bansa

Departamento ng / Puro Walang Hiya

sila pala'y sanhi / ng maraming baha

coal pa'y isang sanhi / ng nagbagong klima

ang fossil fuel pa'y / lalong nagpabaga

one point five degrees ba'y / ating naabot na?

ah, coal at korapsyon / dapat wakasan na!

- gregoriovbituinjr.

09.10.2025

* bidyong kuha sa rali mula Bonifacio Shrine (tabi ng Manila City Hall) patungong Mendiola, Maynila, Setyembre 9, 2025

* mapapanood ang bidyo sa kawing na: https://www.facebook.com/share/v/1QSWxepE8q/ 

21 makasalanan / 21 kasalanan

21 MAKASALANAN / 21 KASALANAN

dalawampu't isang solon yaong pinangalanan

sa flood control scam ngayo'y iniimbestigahan

manyak na may dalawampu't isang kasong rape naman

ay nadakip matapos magtago ng ilang buwan

ah, walang forever, kahit may Forever Twenty-One

dalawampu't isang kongresman, ayon sa balita

ang sangkot sa anomalya ng flood control at sigwa

nakinabang habang masa'y dumaranas ng baha

buti ang mayamang kontraktor, sila'y itinuga

dapat lang managot ang napatunayang maysala

- gregoriovbituinjr.

09.09.2025

* ulat mula sa pahayagang Remate, Setyembre 9, 2025, tampok na balita (headline) at pahina 2 at 3

DPWH - Departamento ng Puro Walang Hiya

DPWH - Departamento ng Puro Walang Hiya

napakasakit na nilalamon tayo ng baha

dahil sa Departamento ng Puro Walang Hiya

ika nga ng mga napanood ko sa balita

lalo't kabang bayan ay kinurakot ng kuhila

naglitawan ang mga ghost project o guniguni

gayong sa dokumento, may proyektong sinasabi

ngunit wala, kinurakot ng mga walang silbi

sa bayan, kundi sa kapitalista't pansarili

kaya sa Barangay Mambubulgar, naging pulutan

ang nangyayaring kabulukan sa mahal na bayan

kontratista at kakuntsaba sa pamahalaan

kung di pa nagbaha'y di pa maiimbestigahan

kaya marapat lang tayong magalit at mainis

sa mga ghost flood control project na galing sa buwis

ng mamamayan, mga utak ay dapat matugis

parusahan at ikulong ang sa bayan nanggahis

- gregoriovbituinjr.

09.08.2025

* mga komiks mula sa pahayagang Bulgar, petsang Agosto 28, Setyembre 3, 5, at 7, 2025, at litrato mula sa Primetime Balita

Banoy

BANOY

mawawalâ na raw ang Pilipinong banoy

sa loob ng limampu o walumpung taon

o kaya'y pagitan ng nasabing panahon

nakababahala na ang ulat na iyon

kung agilang Pinoy na'y tuluyang nawalâ

pinabayaan ba ang ispesyi ng bansâ

tulad ba ng dinasour nang ito'y nawalâ

o tayong tao mismo ang mga maysalà

nakahihinayang pag nawala ang limbas

sa sariling kultura't pabula ng pantas

magiging kwento na lang ba ng nakalipas

itong agilang Pinoy sa kwento't palabas

tatlong daan siyamnapu't dalawang pares

na lang ang naiiwan, panaho'y kaybilis

maalagaan pa ba silang walang mintis

upang populasyon nila'y di numinipis

- gregoriovbituinjr.

09.07.2025

* ulat mulâ sa kawing na: https://www.facebook.com/share/p/1GaoFZ1NrR/ 

The country’s national bird might get extinct in the next 50 to 80 years, an official of the Philippine Eagle Foundation (PEF) said.

In an interview with MindaNews Thursday, PEF director for operations Jayson C. Ibañez said that based on their Population Viability Analysis workshop conducted this week, certain factors indicate the possibility of the extinction of the Philippine Eagle.

Based on the PEF’s latest study published in 2023, there are only 392 remaining pairs of the raptor left in the wild.

via MindaNews https://ift.tt/cYDBjfJ 

Ang maiaalay sa mundo

ANG MAIAALAY SA MUNDO

iyon lang ang maiaalay ko sa mundo

ang ibigay yaring buhay para sa kapwa

at maitayo ang lipunang makatao

at patas sa pagkilos nating sama-sama

sasakahin natin ang mga kabukiran

talbos, gulay at palay ay ating itanim

pinakakain ng pesante''y buong bayan

ngunit sila pa'y api't mistulang alipin

suriin ang lipunan at sistemang bulok

oligarkiya, trapo't dinastiya'y bakit

sa kapangyarihan ay gahaman at hayok

kaylupit pa nila sa mga maliliit

marapat lang nagpapakatao ang lahat

at ipagtanggol din ang dignidad na taglay 

kaya sa pagkilos sa masa'y nakalantad

sa mundong ito'y inalay na yaring buhay

- gregoriovbituinjr.

09.07.2025

* litratong kuha sa bayan ng Balayan, lalawigan ng Batangas

Ingat sa daan

INGAT SA DAAN

naglalakad nang tulala madalas

buti't sa disgrasya'y nakaiiwas

at alisto pa rin sa nilalandas

sa pupuntaha'y di nakalalampas

tulala man itong abang makatâ

pagkat mahal na asawa'y nawalâ

lakad ng lakad, at kathâ ng kathâ

buti't sa daan, di nasusungabâ

kahit sa diskusyon, tulalâ minsan

diwa'y nawawalâ sa talakayan;

bilin sa tulalâ: ingat sa daan

baka madapâ, agad masugatan

buti't ang makata'y di naliligaw

sa baku-bako pa'y nakalalaktaw

sabit sa dyip, buti't di nakabitaw

kundi'y sariling mundo'y magugunaw

- gregoriovbituinjr.

09.07.2025    

Maligayang ika-79 na kaarawan po, Inay

MALIGAYANG IKA-79 NA KAARAWAN PO, INAY

pinaaabot ko'y taospusong pagbati 

sa ikapitumpu't siyam na kaarawan

ng aking inang tunay na kapuri-puri

dahil sa patnubay sa aming kanyang anak

mabuhay ka, Inay, at kami'y napanuto

na talagang ginabayan kami sa buhay

na iyong pagmamahal ay di naglalaho

upang kami'y mapunta sa magandang lagay

maraming salamat po sa pagpapalaki

lalo sa aming anim na magkakapatid

at mga apo mong maipagmamalaki

na pawang karangalan ang inihahatid

muli, pagbati'y maligayang kaarawan

sa inyo, nawa'y manatili pong malusog

ang inyong pangangatawan, puso't isipan

at lubos na pagmamahal ang aming handog

- gregoriovbituinjr.

09.06.2025

Tularan si Eurytus, hindi si Aristodemus

TULARAN SI EURYTUS, HINDI SI ARISTODEMUS

dalawang Spartan ang pinauwi

ni Haring Leonidas ng Sparta

parehong sakit sa mata ang sanhi

na baka makasamâ sa opensa

tatlong daang mandirigmang Spartan

yaong paroroon sa Thermopylae

dalawa'y kabilang sa tatlong daan

subalit pinauwi silang tunay

umalis silang dalawa subalit

bumalik sa digmaan si Eurytus

napaslang sa digma, nagpakasakit

ngunit umuwi si Aristodemus

tinawag na duwag, di kinausap

ng kapwa Spartan, nakakahiya

sa kasaysayan, di naburang ganap

ang sinapit, dangal niya'y nawala

kaya bilang aktibistang Spartan

magandang halimbawa si Eurytus

maysakit man tayo'y ating tularan

hanggang mamatay, nakibakang lubos

- gregoriovbituinjr.

09.05.2025

* litrato mula sa google

Ang nasusulat sa bato

ANG NASUSULAT SA BATO

"Nothing is written in stone."?

ikako naman, mayroon

lapida ba'y anong layon?

di ba't batong marmol iyon?

isa iyong parikalâ

o irony, ang salitâ

na winika ng matandâ

sa bato nasulat pa ngâ

di pa naukit ang gayon

marahil noong panahon

nina Zeus at Poseidon

wala pang sibilisasyon

anong kahulugan nire?

sa masa'y anong mensahe?

wala nga bang permanente?

o sa sitwasyon depende?

- gregoriovbituinjr.

09.05.2025

* larawan mula sa google