PAGKAIN
pansin ko, binibigay ni misis sa akin
ang pagkaing laan sa kanya't di kinain
lalo't batid niyang di ako nag-almusal
maya pa kakain sa canteen ng ospital
para sa kanya ang pagkaing ibinigay
di ako kahati roon sa isda't gulay
pagkat iyon ay sapat lang para sa kanya
diet na laan sa maysakit na asawa
kaya nga pag iyon ay hinati pa namin
tila paglakas niya'y pinagkait ko rin
ngunit pag pakiramdam niya'y gutom ako
ako'y hahatian, kaybait ng misis ko
ngunit siya ang kailangang magpalakas
kaya nagpasiya ako't aking nawatas
kakain ako bago pa siya kumain
upang pagkain niya'y kanyang uubusin
o kaya'y bibili na ako sa kantina
ng pagkain ko upang may kasalo siya
ay, ganyan nga ang dapat kong gawin talaga
upang sabay kaming mabusog ng asawa
- gregoriovbituinjr.
06.08.2025
Walang komento:
Mag-post ng isang Komento