Laro sa app game ng selpon

LARO SA APP NG SELPON

habang nagbabantay sa ospital 

sa selpon ay naglalaro ng app

nang di mainip o matigagal

madaling araw o gabing ganap

pinaglalaro muna ang isip

di makatulog, nais humimbing

kung anu-ano ang nalilirip

na nais tulain habang gising

nagninilay habang naglalaro

habang minsan ay nakatulala

sa laro't utang ba'y mahahango

isipin anong dapat magawa 

at pag may nanilay sa maghapon

ay tiyak may tulang laan doon 

- gregoriovbituinjr.

11.16.2024

* litrato mula sa app game na Twisted Rope, Level 29

Banderang Tad-Balik

BANDERANG TAD-BALIK

sa isang rali ko iyon nakunan

baliktad ang watawat ng samahan

pinuna agad ang mga may tangan

kaya agad nilang inayos naman

baka sa rali nababaguhan pa

sa init ng araw pinayong nila

unang beses tumangan ng bandera

subalit handa sa pakikibaka 

sila'y pinakiusapan lang natin

di sinigawan maging sila'y lumpen

ang mahalaga sila'y nakinig din

silang kaisa sa ating mithiin

baliktad man yaong sa KPML

ang layunin nila'y di mapipigil

na sa puso't diwa nakaukilkil 

na ang bulok na sistema'y masupil

- gregoriovbituinjr.

11.16.2024

* litratong kuha ng makatang gala sa isang rali sa Commonwealth Avenue, Lungsod Quezon, kasabay ng panawagang Climate Emergency, Nobyembre 15, 2024 ng umaga

* KPML - Kongreso ng Pagkakaisa ng Maralitang Lungsod

Ligalig

LIGALIG 

Kahapon, Nobyembre 13, alas-kwatro pa lang ng madaling araw ay nagtungo na ako sa Lung Center sa Quezon Avenue upang pumila sa PCSO. Hihingi sana ako ng tulong sa PCSO dahil malaki na ang hospital bill sa ospital. Nakaratay si misis doon.

Subalit sabi ng gwardya, wala na ang PCSO roon since pandemic. Nabigla ako.

Saan lumipat, tanong ko. Sa Shaw Blvd sa Mandaluyong. Kaya agad akong lumabas sa Lung Center, sumakay ng dyip hanggang Edsa.

Agad sumakay ng MRT patungong Shaw Blvd. Pagdating sa Manuela na ngayon ay Star Mall, sa terminal ng dyip, tinanong ko sa driver saan ang PCSO. Mga 250 meters lang, pwede mong lakarin.

Ah, kaya hindi na ako sumakay ng dyip. Nilakad ko na lang. Hanggang matanaw ko ang gusaling may malaking nakasulat na PCSO. Pasadong alas-singko na ako nakarating.

Pinadaan ako sa likod ng PCSO, habang may gwardya rin sa harap. Nabigyan ako ng guard ng stub number 4. Ibig sabihin, pang-apat ako sa pila. Sinabi rin ng guard na walang walk-in. Nakupo. walk-in ako. Aba'y dalawang linggo na kaming nag-aabang sa onlayn. Kaya sabi ni misis, pumila na lang.

Alas-otso pa pala ang bukas, kaya higit dalawang oras din akong naghintay. Bago mag-9 ng umaga ay tinawag na ako. Nag-usap kami ng taga-PCSO. Wala munang walk-in, sabi niya. Nilabas ko ang mga dokumento. Tiningnan niya iyon at nagbigay lang ng payo subalit sinabi niyang pulos onlayn na ang transaksyon sa PCSO.

Ikasiyam ng umaga, lumabas na ako ng PCSO. Nilakad ang patungong MRT. Sumakay patungong Cubao station.

Aba'y nakalampas ako ng baba. Hindi ko napansing Cubao na pala. Tumayo ako nang umandar na muli ang tren patungong sunod na istasyon. Nakita ko ang QMart. Kaya nakalampas nga ako. Bumaba na ako sa GMA-Kamuning station.

Sumakay muli pabalik ng Cubao. Pagdating ng Cubao ay sumakay ng dyip pabalik sa ospital.

Marahil kaya ako nakalampas ay ligalig na ako, kaunti rin ang tulog. Paano ba mababayaran ang higit Isang milyong pisong halaga ng hospital bill, gayong pultaym akong tibak. Si misis ang may sweldo bilang social worker.

Dahil ako ang asawa, sa pangalan ko naka-address ang sulat mula sa billing station. Ako ang sinisingil. Sinisingil ay isang pultaym na tibak. Paano ka hindi maliligalig? Buti, hindi ako natatabig ng sasakyan o nabubundol habang tumatawid.

naliligalig, litong-lito na

natutulala, grabe talaga

sa ospital, milyon ang halaga

ng paggamot kay misis, di ko na

alam saan kukuha ng pera

aktibistang pultaym ang tulad ko

kumikilos gayong walang sweldo

nasa ospital pa ang misis ko

mga babayaran ba'y paano

subalit lahat ay gagawin ko

sa PCSO aking nilakad

ang mga dokumentong kinalap

mga ahensya'y puntahang sukat

ligalig at pagod man sa lakad

ay gagawin ko pa rin ang lahat

- gregoriovbituinjr.

11.14.2024

Pabahay at karapatan, pinaglaban ni Ka Edwin

PABAHAY AT KARAPATAN, PINAGLABAN NI KA EDWIN

mahahalagang isyu ang ipinaglaban

ni Ka Edwin: ang pabahay at karapatan

nais niya'y maayos na paninirahan

at maitayo ang makataong lipunan

di dapat maagrabyado kahit dukha man

mga nanay ng na-EJK, tinulungan

naaapi'y tinuruan ng karapatan

ipinaglaban ang hustisyang panlipunan

mabuting kakosa, mabuting kaibigan

sa mga nakasalamuha n'yang lubusan

sa PhilRight, ZOTO, KPML, PLM man

TFD, Ex-D na kanyang pinamunuan

taaskamaong pagpupugay, comrade Edwin

daghang salamat sa pinagsamahan natin

sa marami, bayani kang maituturing

mga pinaglaban mo'y itutuloy namin

- gregoriovbituinjr.

11.12.2024

* ito ang ikalawang tulang binasa ng makatang gala noong lamay ng Nobyembre 12, 2024

* kuha ng isang kasama ang litrato sa isang pulong ng Ex-D sa Sampaloc, Maynila

* EJK - extrajudicial killings

* ZOTO - Zone One Tondo Organization

* KPML - Kongreso ng Pagkakaisa ng Maralitang Lungsod

* PLM - Partido Lakas ng Masa

* TFD - Task Force Detainees (of the Philippines)

* Ex-D - Ex-Political Detainees Initiative

Infusion complete

INFUSION COMPLETE

pag tumunog na ang aparato

"infusion complete", ang sabi rito

ang nars ay agad tatawagin ko

dextrose na'y tatanggaling totoo

kayraming suwerong nakakabit

kay misis, tila paulit-ulit

mga pasa sa braso'y malimit

turok dito't doon, anong sakit

patuloy lang akong nagbabantay

sa ospital, dito naninilay

ang maraming tula't bagay-bagay

sana'y gumaling na siyang tunay

pandalawampu't isang araw na

namin sa ospital, umaasa

akong siya'y gagaling talaga

sa sakit na dinaranas niya

- gregoriovbituinjr.

11.12.2024

* mapapanood ang bidyo sa kawing na: https://fb.watch/vOmcTYVzly/ 

Pagpupugay kay kasamang Edwin

PAGPUPUGAY KAY KASAMANG EDWIN

taaskamaong pagpupugay, comrade Edwin

na higit dalawang dekada ang nagdaan

noong dumalaw kayo ni Omar sa akin

habang hinihimas ko'y rehas sa piitan

tandang-tanda ko pa ang pangyayaring iyon

sa piitan tayo unang nagkakilala

hanggang dumating din ang asam na panahon 

ng paglaya't muling naging lingkod ng masa 

sa Ex-D Initiative, ako'y niyaya mo

sa grupo ng dating political prisoners

at doon kumilos, aktibong naging myembro

sigaw natin: Free All Political Prisoners!

pagpupugay, Ka Edwin, sa iyong pagpanaw 

isa kang inspirasyon sa mga kauri

ang mga nagawa mo'y magsisilbing tanglaw 

paalam, Kasamang Edwin, hanggang sa muli

- gregoriovbituinjr.

11.12.2024

Congrats, Aielle Aguilar, Edad 7

CONGRATS, AIELLE AGUILAR, EDAD 7

pagpupugay kay Aleia Aielle Aguilar

na nagwagi sa World Jiu-jitsu Festival

sa Abu Dhabi, siya'y edad pito pa lang

naging kampyon, pinakita ang kahusayan

siya ang pinakabatang three-time world champion

talagang ginapi ang nakalaban doon

sa Kids 2-Gray Belt ay wala nang nakalaban

kaya umakyat sa mas mabigat na timbang

anang ulat, mula labingsiyam na kilo

ay umakyat ng tatlong kilo at tinalo

ang mga kalaban at ganap na inangkin

ang ikatlong titulong pandaigdigan din

kaya sa batang kampyon, halina't magpugay

na sa kanyang larangan ay napakahusay

- gregoriovbituinjr.

11.11.2024

* ulat at litrato mula sa pahayagang Abante, Nobyembre 11, 2024, pahina 11

Bone marrow biopsy

BONE MARROW BIOPSY

isinagawa kagabi

ng mga doktor

yaong bone marrow biopsy

sa aking misis

bone marrow pala'y bulalo

ng ating buto

pangatlong testing na iyon

sa isyung blood clot

o pamumuo ng dugo

na nagbara na

sa kanyang mga bituka

di makapasok

ang nutrients at oxygen

baka mabulok

ang ilang mga bahagi

niyong bituka

pag di agad naagapan

nag-surgery na

hanggang ngayon di pa batid

ng mga doktor

ang sanhi bakit nag-blood clot

sa may bituka

negative ang unang testing

at pangalawa

ikatlo pag nag-positive

matutukioy na

ang sanhi ng pagba-blood clot

nang malapatan

na ng kaukulang lunas

upang si misis

ay gumaling na sa sakit

na dinaranas

- gregoriovbituinjr.

11.11.2024

Salà ng ina

SALÀ NG INA

ano kayang klase siyang ina?

na binugaw ang apat na anak

na edad dalawa, apat, anim

at panganay na labingdalawa

paglabag na iyon sa OSAEC

o batas na Online Sexual Abuse

and Exploitation of Children, bakit

niya nagawa'y salang kaylupit 

sadyang kawawa ang mga bata 

sa nakagugulat na balita 

sa hirap ng buhay, ang nagawa

ng ina'y krimen, kaytinding salà

paano pag anak na'y lumaki?

sila kaya sa ina'y kakampi?

ang ina ba nila'y masisisi?

o salang ito'y isasantabi

- gregoriovbituinjr.

11.10.2024

* ulat mula sa pahayagang Bulgar, 11.10.2024, p.2

Hemoglobin

HEMOGLOBIN

nang dinala ko na sa ospital si misis

mababa na pala ang kanyang hemoglobin

terminong iyon ay noon ko lang narinig

red blood cell na'y di makabigay ng oxygen

maraming terminong dapat kong matutunan

nang maunawaan ang mga kahulugan

terminong medikal na dapat kong malaman

upang si misis ay aking maalagaan

limang punto lamang ang hemoglobin niya

ang normal pala niyon ay labingdalawa

unang linggo pa lang, ilang bag ng dugo na

sa mga testing, nakitang anemic siya

at kagabi, muling sinalinan ng dugo

si misis, ako naman ay nakatalungko

ramdam ko ang kanyang pagdurusa't siphayo

minamasdan ko siya't talagang hapong-hapo

- gregoriovbituinjr.

11.09.2024

* litratong kuha sa ika-18 araw namin sa ospital

Salin ng tula ni Charlie Chaplin

SALIN NG TULA NI CHARLIE CHAPLIN
Malayang salin ni Gregorio V. Bituin Jr.

Nilason ng kasakiman ang diwa ng tao,
na binarikadahan ng poot ang daigdig,
na ala-gansang hinakbangan tayo sa dusa't
pagdanak ng dugo.

Nakagawa tayo ng mabilis,
subalit sarili natin ay ipiniit.
May makinaryang ang bigay ay kasaganaan
ngunit nilulong tayo sa pangangailangan.

Ginawa tayong mapanlait ng ating nalalaman;
ang ating talino, matigas at hindi mabait,
Labis tayong nag-iisip at kaunti ang nararamdaman.

Higit pa sa makinarya,
kailangan natin ang sangkatauhan.
Higit pa sa talino,
kailangan natin ng kabutihan at pagkamahinahon.

Kung ang mga katangiang ito'y wala
buhay ay magiging marahas at lahat ay mawawala.

~ Charlie Chaplin

* ang mga litrato ay mula sa isang fb page
11.08.2024

Si Sir Charles Spencer Chaplin, Jr., KBE (Abril 16, 1889 – Disyembre 25, 1977), mas kilala bilang Charlie Chaplin, ay isang Ingles na komedyanteng aktor at tagagawa ng pelikula na nagkamit ng mga parangal sa Academy Awards. Naging isa sa mga pinakasikat na artista, gayon din bilang isang tagagawa ng pelikula, kompositor at musikero noong nauna at gitnang panahon ng "Klasikong Hollywood" ng pelikulang Amerikano. (Wikipedia)

A poem by Charlie Chaplin

Greed has poisoned men's souls,
has barricaded the world with hate,
has goose-stepped us into misery
and bloodshed.

We have developed speed,
but we have shut ourselves in.
Machinery that gives abundance
has left us in want.

Our knowledge has made us cynical;
our cleverness, hard and unkind.
We think too much and feel too little.

More than machinery,
we need humanity.
More than cleverness,
we need kindness and gentleness.

Without these qualities,
life will be violent and all will be lost.

Barya lang po sa umaga

BARYA LANG PO SA UMAGA

nagtraysikel ako upang puntahan

ang pinapakay sa isang tanggapan

upang pagamutan ay mabayaran

upang hirap ng loob ay maibsan

nag-aayos ng mga dokumento

para sa guarantee letter na ito

pupuntahan ang mga pulitiko

DSWD at PCSO

nasa ospital pa kasi si misis

dahil sa sakit niyang tinitiis

sa ospital ay maagang umalis

kaya dapat pagkilos ko'y mabilis

buti't sa bulsa ko'y may mga barya

ika nga, "barya lang po sa umaga"

ang aking misis nawa'y gumaling na

sabi, habang may buhay, may pag-asa

- gregoriovbituinjr.

11.08.2024

* kuha ang litrato, Nobyembre 7, 2024

Babantayan kita magdamag

BABANTAYAN KITA MAGDAMAG

mahal ko, ako'y narito lang

upang punan ang pagmamahal

di man ngayon makapaglibang

dahil narito sa ospital

gagawin ko ang makakaya

kahit ikaw ay nahihimbing

patuloy pa ring umaasa

na ikaw talaga'y gagaling

habang nariyang nakaratay

tandaang naririto ako

hindi magsasawang magbantay

sa ospital para sa iyo

nawa'y lalagi kang matatag

nang gumaling na't mapanatag

- gregoriovbituinjr.

11.07.2024

Tricyle blg. 001

TRICYCLE BLG. 001

bilang 001 ang tricycle kong nasakyan

ibig sabihin una siya sa listahan

naisip ko ngang 007 ay abangan

parang James Bond 007, lilitratuhan

at gagawan ko iyon ng mahabang tula

marahil maikling kwento o kaya'y dula

na sinakyan iyon ng mga manggagawa

na serbisyo sa bayan ay mahaba-haba

natsambahan ko lamang makasakay doon

habang tinatrabaho yaong nilalayon

habang nararamdaman sa sikmura'y gutom

habang wala nang oras sa paglilimayon

tricycle 001 at James Bond 007

nakakatuwang karanasan na sa akin

tricycle 007 sana'y masakyan din

upang may tula't kwento akong kakathain

- gregoriovbituinjr.

11.06.2024

* kuha sa tricycle na nasakyan ng makatang gala, Nobyembre 6, 2024

Pang-14 na araw na namin sa ospital

PANG-14 NA ARAW NA NAMIN SA OSPITAL

hanggang ngayon, nagbabantay pa sa ospital

kay misis na nakaratay na ng matagal

panglabing-apat na araw na namin dito

ang asam ko'y gumaling na siyang totoo

ako ang bantay dahil ako ang asawa

at ang mahalaga ay lalakarin ko pa

ang dokumento upang humingi ng tulong

sa ilang ahensyang maaaring tumugon

salamat din kay Regine na kasama niya

sa trabaho na umaasiste talaga

halinhinan kami sa pagbantay kay Libay

na kapara ng ilaw sa gabi'y patnubay

kaytindi na ng sakit niyang tinitiis

na sa pang-apat na araw siya'y tinistis

ng mga doktor pagkat malapot ang dugo

na nagbabara sa bituka, ay, nakupo

sana'y umalwan na ang kanyang pakiramdam

at gumaling nawa sa kanyang karamdaman

lahat ng asam na tulong sana'y dumating

at si misis sa kanyang sakit na'y gumaling

- gregoriovbituinjr.

11.05.2024

Abito at sotana

ABITO AT SOTANA

akala ko'y pareho ang abito at sutana

subalit sa palaisipang ito'y magkaiba

Siyam Pababa: Damit ng pari; Sagot: Abito

na kaiba naman sa Damit ng sakristan dito

Apatnapu't Isa Pahalang: Damit ng sakristan

Sagot: Sotana; magkaiba nga ng kahulugan

subalit sa ibang palaisipan, ang sotana

at abito ay magsingkahulugan sa kanila

na sa palaisipang ito'y pinag-ibang sadya

kaya may bagong natutunan ang abang makata

ang pari at sakristan ay may magkaibang baro

kahit parehong puti ay agad mong mahuhulo

ang sotana'y sa sakristan, ang abito'y sa pari

sa mga kahulugan ay may bagong nahahawi

dagdag-kaalaman at paglalaro ng salita

na magagamit sa sanaysay, kwento't ibang akda

- gregoriovbituinjr.

11.05.2024

* mula sa pahayagang Pang-Masa, Nobyembre 5, 2024, p.7

Kwentong manananggal

KWENTONG MANANANGGAL

may multong sa kanya'y nagtanong:

"bakit ka kalahating multo?"

at ang sagot niyang pabulong:

"noon ay manananggal ako"

napakapayak ng istorya

ng nagmumultong manananggal

kaya pala namatay siya

ay di nakita ang natanggal

niyang kalahating katawan

nang minsang sumikat ang araw

wala na siyang nabalikan

at siya'y tuluyang nalusaw

sa komiks man ay patawa lang

ni Mang Nilo na nagsalaysay

kwento ng kaibang nilalang

ngunit may lagim yaong taglay

- gregoriovbituinjr.

11.04.2024

* komiks istrip mula sa pahayagang Pang-Masa, Nobyembre 2, 2024, p.7

Na-redtag sa ospital

 

NA-REDTAG SA OSPITAL

akala ko'y sa pulitikal na gawain lamang

maaaring ma-redtag, pati pala sa ospital

pag halagang kalahati'y di agad nabayaran

iyan ang naranasan namin nang dito'y tumagal

pag redtag ka, lahat ng gamot ay bibilhin mo na

kahit madaling araw ay gigising ka talaga

paano kung disoras ka maghahanap ng pera

upang makabili ng kailangan sa parmasya

isa itong karanasang sadyang masalimuot

lalo't pakiramdam ko'y para bang binabangungot

lalo't mister ng pasyente'y tibak na walang sahod

napupuyat, walang tulog maghapon at magdamag

sa kalagayan ni misis dapat magpakatatag

lalo't hanggang dito sa ospital pa'y nare-redtag

- gregoriovbituinjr.

11.04.2024

Himaton ay YOU at YOUR

HIMATON AY YOU AT YOUR

sa cryptogram na palaisipan

YOU at YOUR ang himaton ko o clue

imbes THE o THEM ang kasagutan

dahil sinilip ang angkop dito

salamat sa dyaryo't may libangan

at pinagkakaabalahan ko

pag nagbabantay sa pagamutan

kay misis na naopera rito

kaysarap laruin ng cryptogram 

na pampatalas ng ating ulo

na talaga mong kagigiliwan

pampatay-inip at ehersisyo

- gregoriovbituinjr.

10.03.2024

* "When you change your thoughts, remember to also change your world." ~ Norman Vincent Peale

* mula sa Philippine Star, Nobyembre 3, 2024, p.2

Makakalikasang supot ng botika

MAKAKALIKASANG SUPOT NG BOTIKA

bumili ako ng bitamina

doon sa Mercury Drug kanina

supot na papel nila'y kayganda

at may tatak pang-ekolohiya

magandang paalala sa atin

upang mga itatapon natin

plastik man iyon o papel man din

ay sa maayos natin dadalhin

Reduce, Reuse, Recycle ang tatak

paalala itong munti't payak

na dapat namang maging palasak

nang basura'y di magtambak-tambak

salamat at may abisong ganyan

na talagang pangkapaligiran

na sana'y sundin ng mamamayan

para rin sa ating kabutihan

- gregoriovbituinjr.

11.03.2024