Sabado, Hunyo 28, 2008

Tula: Ang Sakripisyo ng Dalawang Bata - ni GBJ

ANG SAKRIPISYO NG DALAWANG BATA

ni Greg Bituin Jr.

(alay kina Jeniifer Rebamontan, walong buwan, at Manuel Dorotan Jr., isang buwan, na namatay matapos ang marahas na demolisyong nangyari sa kanilang tahanan sa C3 North Bay Boulevard South, Navotas, Oktubre 9, 2001, Martes)


O, kay-aga nitong inyong kamatayan

Itong mundo’y hindi n’yo na nasilayan

Dahil lang sa mga buwayang gahaman

Inilit na agad ang inyong tahanan.


Magulang n’yo’y pilit nilang ginigipit

Mawasak lamang ang tahanang kayliit

Sa kagustuhan na bahay n’yo’y mailit

Pati inyong buhay maagang inumit.


Ni hindi dumaan sa tamang proseso

Itong demolisyong ginawa sa inyo

Sa batang gaya n’yo’y dapat isiguro

Ang kinabukasang dapat makatao.


O, sadyang kaylagim ng inyong sinapit

Sa magulang ninyo ay napakasakit

Hustisya ay dapat na inyong makamit

Dapat parusahan silang nagmalupit.


- tiglalabingdalawang pantig bawat taludtod, may sesura sa ikaanim, nalathala sa Taliba ng Maralita, Disyembre 2001)

Walang komento:

Tungkol sa Akin

Aking larawan
Adhikain naming tipunin ang mga tula, maikling kwento, sanaysay, awitin, at iba pang sulating likha ng manggagawa, maralita at iba pang sektor ng lipunan, lalo na yaong nananawagan ng pagbabago at pagtatayo ng tunay na lipunang makatao.